BONARCADU- Sa polìtica sarda at abbandonadu sa limba sarda, su Movimentu Linguìsticu, tando si movet cun sa democràtzia digitale dae su bàsciu. Facebook (Su libru de sas Caras), Bortadore Automàticu, Progetos europeos in subra de su digitale, programmmas e aplicatziones in sardu, revista on line, giogos, blog, chat.Sa de tres editziones de sa festa s'at a fàghere sàbadu 23 a borta de die e dòminiga 24 in Bonarcaddu, cun s'organizatzione de su "CSU- Coordinamentu pro su Sardu Ufìtziale": a sa die ant a partetzipare ativistas, artistas e politicos.
Sa festa benit ammaniada cun sa collaboratzione de sa Comuna de Bonarcadu, de s'Assòtziu Su Condaghe e de àteros grupos identitàrios: pro duas dies, dae sas 4 e mesu de borta de die de sàbadu 23 e dae sas 10 de mangianu de domìniga, in su tzentru polivalente de Su Lare, b'ant a èssere relatas de istòria, filosòfia, polìtica linguistica: b'at a èssere fintzas sa presentada de su progetu "The Digital Language Diversity Progect" dae banda de Claudia Soria, de su CNR de Pisa e sa presentada de su Sintetizzadore "Sintesa", fatu dae banda de s'editore Condaghes cun s'agiudu de su chircadore Gianfranco Fronteddu de s'Universidade de Casteddu. S'At a chistionare fintzas de su progetu de Google cun sa limba sarda, curadu dae Fabritziu Pedes. Sa Chena e su Pràngiu de sàbadu e dòminiga ant a costare 10 euros: dòminiga b'at a èssere sa visita in sardu a su santuariu e a sa crèsia de Bonacatu. E posca romanzos e musica. Totu in donu, pro chie cheret passare duas dies in su mundu de sa limba sarda.